فتحت عينيا في أوائل السبيعنات ... والبلد لسه فيها روايح الوطنية والحماسة وقريبة من النصر والثورة والاصلاح.. المهم...

حبيت البلد دي... وبقى حبها يجري ف دمي.. وأقبل لها الاعذار، واتحمل عشانها النار،
ومهما انكوي منها ولا من اللي حاكمينها ... اقول برضه دي تبقى بلدي
أمي.. مربياني ومعلماني.. ومكبراني...وكل ما اكبر ... حبها يكبر... لحد ما بقت هي أغلى وأعز حاجة عندي...
وكل أم فيها أمي ... وكل أب فيها بقى والدي.. وكل شبابها أخواني.. وكل شباتها بقم عاري..
أخاف عليهم من النسمة.. من الهمسة من الكلمة وأريديهم.. فوق شواشي النخل عاليين...يشرفوني. ما انا اخوهم ...
وكل يوم كان يكبر معايا عزتي بنفسي وافتخر إن أنا مصري.... وأمشي بزهو بين كل الخلايق بمصريتي اتباهى واتعايق...
والله كنت أعدي كتييييير.. هفوات وسقطات.. من ابن خاين او ابن عاق..
اللي يحكم بامره ...واللي يمشي بامره.. واللي ما فادهاش في عمره..
واقول هفوات هفوات ... وبتحصل ف احسن العائلات..
كافحت وقاوحت لحد ما خلصت تعليمي.. وفرحت بانجازي واتماديت ف اخلاصي..
وقلت ابداً لا يمكن مستحيل.. أسيب بلدي لازم أكد فيه وأخد نصيبي وأسد الدين..
أنا اتعلمت وقلت لازم اعلم غيري.. عشان اريح ضميري..
قدمت اوراقي في وزارة التعليم... وبديت اشتغل بالحصة ... واساعد على قد ما اقدر شبابها وبناتها واحلوت القصة...
خطبت زي كل الشباب.. وبدأت أبعد عن عيشة العزاب.. واقول هانت يا بلدي بكره يجيني ولدي واعلمه يحبك ..ويكون عونك ف كربك...
فجأة لقيت كل شيء بيتغير...ووقفت متحير...
وظيفة قالولي مفيش.. خطوبة متلقيش..
غش وخداع ومكر وبتاع...
إيه ده أنا كنت فين... وده جالنا منييين..
قالولي اصحى انت كنت في سكرة عايش في وهم الوطن.. اللي اتملى عطن...
إشي انفتاح.. واشي اكتساح.. وبقت سداح مداح...كله دلوقتي بيدور على الارباح..
عايز وظيفة ابيج تجد أو تتنكس.. عايز عروسة.. معدشي خلاص والنبي اتوكس...
احتارت مشاعري وانهارت دوافعي.. وانفعالاتي اتلخبطت.. ...
اكره واحب ...وأهدى وأدب.. واضحك وابكي... ولا قدرشي احكي...
ليشمتوا فيا... اللي ضحكوا عليا... ووقفت محتار وتاهت الافكار..
وبقت مصر مصيدة ولقيتني بقيت فيها كما الفار... بالنهار ادور .. وليلي مذعور..
وقبل ما انهار.. ويجرفني أي تيار.."فكري او ديني" ...
قررت أسيبها وانا مرغم.. وحجزت تذكرة ..وركبت طيارة وانا مرغم.. ..
وبكيت على السلم.. وكنت بتألم.. وصرخت والله " إن الله يعلم أنك أحب أرض الله إليّ ولولا أن أهلك أخرجوني منك ما خرجت"....
واترميت ف احضان الغربة.. وقلت احاول اخرج من الكربة، اتاري الناس برة برضه بتتغير...
أول واحد قابلني قال يابني عايز تعيش هنا مستور.. اتعلم الندالة.. .اوعاك تكون تور..
تنحت له مانيش فاهم.. قولت له ....يا عم غووووووووووور..
ودارت الايام ولفت الايام... وافتكرته .. آه والله افتكرته.. كان عنده حق.. وانا اللي قلت لأ ..
مرضيتش اكون ندل.. بقيت تايه وهربان من العدل.....
المهم مطوليشي عليكم... قولوا طوووووول .. وقول واحكي من الاول...
لقيت نفسي غريب ومتغرب.. ومخالف "من غير فيزا" وف كل مكان بهرب..
مسكت نفسي واستمسكت.. وفيها انا اتحكمت.. وربي عاني.. وخف عني..
وبقيت ف البلد دي شرعي.. اول ما بقاللي فيزا.. افتكرت مصرالعزيزة..
ونسيت آهاتي فيها.. وخيانات أهليها.. وقلت لابد ارجعلها فوراً..
وحجزت ومسكت التذكرة ف ايدي.. وقلت انزل اجيبها من اولها..
من أول حتة ع الساحل.. نزلت مطار اسكندرية اللي كانت ماريا...
ولحظة نزلت ع المطار وطيت ع الارض ابوسها.. بقلب حنون.. مسكني واحد جنبي قاللي اهدي يا مجنون..
قابل الباشا الاول .. واكييد مشاعرك هتتحول.. بصيتله باستغراب.. ايه ده .. شعرت بالارهاب..
وانا باضحك ف وش الظابط.. قاللي مالك هتتعابط... اتلعثمت واتحشر في زوري الكلام..
وقاللي من امتى برة مصر انطق ليك كااااااااااام؟؟
رديت بعيون زايغة وصوت حزين خمسة.. خمس سنين..
قاللي وفرحان .. اكييد عامل عاملة... روح هناك على امن الدولة...
تسع ساعاااااااااات يا محترميييين في مطار المصريين.. سين وجين وجيم وليم..
كنت فين رحت فين عرفت مين وشوفت مين ..
وانا على صرخة واحدة ياخوانا والله العظيم.. أنا مصري.. وأفلاطون عصري ..
حالف ما عشق سواها.. ولا يحلالي إلاها...
والله مارحت مكان غير من هنا لهناك.. ومانيش بتاع حركات...
المهم قال انه صدقني..
خولصنا من دي...مسيكنا في دي.....
قاللي : قولي بقى انت من سوهاج صح..؟؟
قولتله وانا بدور على ابتسامة .. أيوه صح؟؟
قاللي طب ايه اللي نزلك اسكندريييييييييييييييييية؟؟ انا قولت : هااااااا هوه ممنوع عليااااااااا...
قاللي بطل لماضة يا تنزل القاهرة يا تنزل لاقصر هي مش سايبة تنزل ف المكان اللي يعجبك.. ،
تنحت اكتر وبطلت افكر.. وقلت حاضر .. وعملت فيها عبيط.. وخرجت عايز م المطار ارجع تاني .....