كلما مرت أمامي كلمة عداااد... - وما أكثرها هذه الأيام- تذكرت أسوء مأساة حدثت لي منذ امتلكت شقة بمفردي وأصبح لدي عداد بأسمي يجب قراءته كل شهر...
ده كلام عادي جداً ولا غوبار عليه... بتحصل في أحسن الشقق....

الاجازة اللي فاتت دي على طوال... ربنا ابتلاني بقارئ عدادات ... كرهني في عيشتي.. زقاني المر ناقع.. على كل الاشكال والالوان....

جه قرا العداد 5 مرات في الشهر اللي انا قعدته... المصيبة إنه كان يجي بدري قوي الساعة 7 او 8 بالكتير (ده في رمضان خلوا بالكم) أتاريه كان بيتسحر ويصلي الفجر ويطلع يلف ع الشقق...

ولما حاولت أعترض أو أبدي إستياء... إتخشب علي وقاللي ... يعني متأكدشي من شغلي... ولا عايز الفاتورة تطلع فيها زيادة وتشتكني ...
ولا يطلع فيها نجص واحطه من جيبي..
مش كفاية ساكن في الخامس.. ونفسي اتجطع من الطلوع والنزول...

قلتله طيب يا بو عمو مانتي قرايته 4 مرات قبل كده..

قاللي يعني هو أنا مخي دفتر ... ما كل ما اقراه وانزل اكتبه أنساه تاني... الرقم طويل قوي...

ملحوظة= أصل هو حاطط الدفتر ع العجلة وميقدرش يطلع العجلة الدور الخامس=

عشان كده بس سامحته وفهمت وجهة نظره ..

استغفر الله العظيم...إن بعض الظن إثم ..كنت ظالمه...